“A máis nobre aspiración espiritual consiste en adquirir plena conciencia da nosa vida no universo” (Josep Comás i Solá).

En 1929 publícase en Barcelona El Cielo, escrito por Josep Comás i Solá, obra clave de astronomía ilustrada que durante anos serviu de guía para moitos afeccionados á observación dos astros.

En 2011 Anxo Santiago trasládase a vivir á mesma rúa onde se atopa Vila Urania, casa na que durante anos viviu Josep Comás e dende onde descubriu diversos planetas como o Hispania.

Eclipse nace da admiración do autor pola figura do astrónomo e a tristeza de non poder ver ese universo que se describe na súa obra El Cielo. Este punto de partida lévalle a realizar unha viaxe en procura dese ceo estrelado, que aínda estando aí, non pode ver, debido en gran parte á gran contaminación lumínica das nosas cidades e arredores. Algo moi diferente do que podía observar Comás desde o seu pequeno observatorio no terrado de Vila Urania.

Eclipse é un proxecto baseado na intervención do libro orixinal El Cielo, onde Santiago traballou tanto coa superposición das súas imaxes sobre as ilustracións do libro, como coa edición de textos seleccionados en cada unha das páxinas. Deste xeito, no que se xoga con textos e imaxes, nace ese punto de encontro entre dous mundos, tan lonxe e tan preto ao mesmo tempo.

O interese pola fotografía de Anxo Santiago (Pontevedra, 1978) comeza desde moi novo, sendo a súa formación maioritariamente autodidacta. Santiago emprega a fotografía como medio para comprender mellor o mundo que lle rodea. Interésanlle temas como o paso do tempo e ,sobre todo, a relación actual do individuo coa natureza. Aínda que realizou diversos cursos e talleres, non é ata 2018 cando desenvolve o seu primeiro proxecto fotográfico Eclipse, durante o curso anual de Fotografía Documental de Autor el El Observatorio (Barcelona). Devandito traballo foi exposto en 2021, na segunda edición do Luminic Festival (Sant Cugat).