TILL é a preposición de tempo «ata» ou «ata que» en inglés e, á súa vez, denomina un tipo de sedimento de orixe glaciar que aparece tras os movementos de arrastre. A serie fotográfica que presenta o dúo Lemos+Lehmann baixo este nome desenvólvese en paisaxes boreais e convida ao espectador a transitar un espazo que se desvanece, a contemplar unha pegada, un pouso.

TILL fálanos dun desxeo físico e emocional.

Pat Lemos (Galicia) e Lukas Lehmann (Alemaña) son artistas visuais licenciados en Belas Artes; creadores e membros do dúo artístico Lemos + Lehmann, que actualmente reside en Islandia. A súa práctica xira ao redor da natureza e a súa intrínseca relación visual e emocional coa existencia. Achegándose á súa contorna a través da práctica do camiñar, a deriva e a atenta observación, os artistas capturan e expoñen o espazo liminal entre a beleza, a fascinación, a impermanencia e a incerteza. Utilizando a fotografía analóxica como ferramenta principal e poñéndoa en diálogo co son, a escultura e a instalación, o dúo difumina as fronteiras disciplinarias co obxectivo de explorar novos campos de percepción, contemplación e emoción.

A mirada de Lemos + Lehmann é crúa pero recuberta de sutilezas, movéndose formalmente do figurativo á abstracción e conceptualmente do natural ao místico, e o sobrenatural. É no espazo expositivo onde o proceso creativo chega ao seu fin e a obra transfórmase, unha especie de rito de paso no que cada fase anterior cobra sentido. Ao convidar o público á contemplación e á presenza consciente, os artistas propoñen unha experiencia completa e sensorial, unha viaxe que, sostido no tempo, alberga algo profundamente espiritual. Algo que permanece.