As fotografías que conforman a exposición TA-RA. Gales 2013-2022 son o relato dunha década de vida no Reino Unido, en concreto no País de Gales. A experiencia que describe Sebastián Bruno na súa obra é unha mestura de estrañeza e familiaridade, marcada por acontecementos sociopolíticos históricos e actuais, como son doce anos de políticas de austeridade, o Brexit e a crise económica actual. Trátase dun percorrido por personaxes, terreos e texturas que conforman o tecido cotián do lugar, o cal revela unha interpretación alternativa e aberta dun país en proceso de cambio.

Cunhas imaxes tan orixinais como clásicas, Sebastián Bruno describe a sociedade actual de Gales mediante o retrato, xénero fotográfico por antonomasia, para captar o instante en que a máscara social tapa ao individuo, nun xogo irónico, mordaz e tenro á vez. Destacan, no autor arxentino, a coherencia visual nun proxecto de longo percorrido no tempo e a súa firme vontade de expresarse a través da linguaxe da fotografía, na procura dun estilo propio sen concesión ás modas.

TA-RA foi o Proxecto gañador do Premio Mallorca de Fotografía Contemporánea 2022 pola súa inserción no discurso da fotografía contemporánea, así como a exploración que leva a cabo dun territorio europeo, coa intención de indagar no máis íntimo das persoas que o habitan.