La Île de Suquet é o primeiro de cinco viaxes a outros tantos territorios imaxinarios. Neste caso, as autoras do colectivo Papel de Calzoncillo inspíranse no universo plástico e creativo de Suqui Castro, inquietante, indexical e sorprendente. Mediante unha edición colaborativa, na que todas as imaxes son de todas e á vez de ningunha, chegan a un espazo distópico propio das illas imaxinarias, onde se dá un fascinante encontro co surreal e imposible. Esperemos que, durante uns instantes polo menos, podamos mergullarnos nesta illa sen necesidade de buscar explicacións.