Raza
Tono Arias
Raza. Intre no que sae o sol nun día de choiva.
Cada ano, durante os meses de verán, os homes e mulleres dalgunhas zonas do rural galego suben ao monte a sanear aos cabalos que viven en liberdade (desinfección, corte de crines, marcaxe de poldros e venda de animais). Este encontro do home e o animal é o que o autor documenta neste ensaio visual.
Raza quere tamén afondar na realidade social do rural de Galicia para reflexionar sobre outros conceptos máis universais, como a relación do ser humano coa natureza e os animais, a memoria, a soedade do individuo, o amor e a morte, o territorio e a súa transformación.
Arias constrúe así un relato composto de imaxes con certo enigma, hibridándoas con outras fotografías máis abstractas, de corpos e texturas que se misturan e que intentan trasladar ás persoas que as ollan a unha dimensión paralela. Así, as imaxes funcionan como incógnitas dentro do relato, suxiren máis que contan, e van tras a procura do invisible.
Tono Arias
4NOV–11DEC
Fundación Luis Seoane Pasillo central primeiro andar
Tono Arias
Tono Arias (Duci, Allariz, 1965) é un fotógrafo de prensa e documentalista dende os anos 90, colaborando con diversos medios de comunicación como Faro de Vigo, Correo Galego, Agencia EFE, El País e El Mundo, entre outros.
Desde o ano 92 traballa como fotógrafo independente e crea o seu propio estudo, onde realiza diversos traballos profesionais no ámbito da fotografía industrial, publicidade, moda, arquitectura, editorial e documental.
No 2012 inicia o proxecto DISPARA, un espazo web, galería e librería, destinado a reunir traballos fotográficos de carácter documental e artístico e a servir de punto de encontro entre autores, para fomentar o desenvolvemento de proxectos culturais relacionados coa fotografía.
