Miguel Auria (Ourense, 1985) é Técnico Superior en Artes Plásticas e Deseño con especialidade en Fotografía Artística pola Escola de Artes e Superior de Deseño Antonio Faílde de Ourense e Titulado Superior en Violín polo Conservatorio Superior de Música de Vigo. Continuou a súa formación na Universität der Künste de Berlín e na Escola Superior de Música e Artes Escénicas do Porto, e realizou cursos con autores como Joan Fontcuberta, Carmen Dalmau, David Jiménez, Oscar Molina, Omar Joseff ou Manuel Outumuro.

Expuxo individual e colectivamente en diferentes edicións do Festival Outono Fotográfico. Foi finalista en certames como o Premio Galicia de Fotografía Contemporánea, o Premio COMEL de Arte Contemporáneo en Italia, o Premio José Lamiel de Artes Plásticas, o Duodécimo Premio Auditorio de Galicia para Artistas Novos/as, o Premio de Artes Plásticas “La Brocense” en Cáceres, ou a IV Convocatoria Aberta para Artistas “Lírica al Margen”, onde acadou o primeiro premio. Tamén foi seleccionado na XXVII edición do Concurso Propostas de Axudas á Creación Visual de VEGAP, no Colexio de España en París e en numerosos certames nacionais de artes plásticas e fotografía.