Ollo

Ollo é un colectivo fotográfico multidisciplinar, nado neste ano, que traballa na creación, divulgación e difusión de historias relevantes para a sociedade a través da linguaxe da imaxe e da narrativa audiovisual.

As figuras vinculadas ao fotoxornalismo que integran Ollo son Vanessa Casteleiro, Óscar Corral, Agostiño Iglesias, Brais Lorenzo, Óscar Pinal, Adra Pallón e Paula Quiroga. Completan o equipo Sara García e Daniel Lázare no referente ao apartado de xestión cultural e Sabela Eiriz colabora nas tarefas de edición e curadoría.

O fin principal do colectivo é xerar reflexión na poboación ante as diversas problemáticas sociais e mediambientais ás que se enfronta a actual sociedade. Para acadar este fin unímonos persoas pertencentes a diversos eidos tales como o fotoxornalismo, o documentalismo gráfico e videográfico e a xestión cultural. O proxecto colaborativo apóiase na creación de proxectos culturais, na oferta formativa e no desenvolvemento de proxectos editoriais e comerciais.

Neste intre atópase iniciando a súa andaina en redes tomando como preámbulo do seu lanzamento a colaboración coa revista 5W a través do proxecto Lumes, un traballo fotográfico en progreso de máis de quince anos de imaxes e experiencias arredor dunha problemática ben coñecida pola sociedade galega: o desastre ambiental e social provocado polos incendios que asolagan o noso territorio ano tras ano.

En FFoco, o colectivo Ollo proxectará unha mostra do seu traballo e dará conta dos catro eidos nos que se moven: cultural, formativo, comercial e editorial.