Obradoiro con Sebastián Bruno
Obradoiro: 1 - 2 NOV
Fundación Luis Seoane
O obxectivo deste taller práctico é desenvolver un retrato contemporáneo sobre a cidade da Coruña, que se concretará nunha pequena publicación colectiva que os participantes levarán en formato PDF para que poidan imprimir de maneira independente.
Na primeira parte da actividade, Sebastián Bruno falará do seu traballo: como emprega o flash e como aborda a descoñecidos para retratalos. Despois, os participantes sairán a fotografar de maneira intensiva e espontánea, de maneira individual ou en grupos de ata tres persoas. A medida que se obteñan as imaxes, iranse descargando e imprimindo, para desenvolver de maneira colectiva a edición e narrativa do traballo resultante.
Os participantes deberán traer o seu propio portátil e cámara dixital con flash.
Inscricións: ffocofestival@gmail.com indicando no asunto ‘Obradoiro’Sebastián Bruno
Sebastián Bruno (Bos Aires, 1989) é fotógrafo e cineasta arxentino. Viviu e traballou en Gales ata 2010, actualmente está establecido en París.
Na súa práctica fotográfica tenta comprender e explorar a complexidade das relacións humanas dentro do seu contexto político, histórico e social. Interpretar o mundo, as comunidades e as persoas que poden ser pasadas por alto en nome do progreso, é o que lle proporciona os medios para crear narrativas auténticas, que van máis aló dos límites da práctica documental tradicional.
