O Desengano
Julián Barón
O Desengano é un proxecto visual baseado nunha serie de actividades expositivas e editoriais ao redor do traballo que o fotógrafo Julián Barón realizou sobre o desastre do Prestige en decembro de 2002. Xunto á exposición, comisariada por Xosé Lois Gutiérrez Faílde e composta dunha serie de 28 cruces con fotografías de Julián Barón, inclúese un documental dirixido por Manuel Vargas, así como un fondo de fotolibros, catálogos e material impreso diverso para a súa consulta.
Nos primeiros días do mes de novembro de 2002, o buque petroleiro Prestige afundíase tras sufrir unha vía de auga a uns 250 quilómetros da Costa da Morte, provocando un dos maiores desastres medioambientais da historia de Europa, un acontecemento que tivo un enorme impacto político, económico, cultural e social. Os milleiros de voluntarios e a presión do movemento Nunca Máis minimizaron os danos da vertedura sobre unhas costas cuxos recursos eran e seguen sendo vitais para a poboación da zona.
En O Desengano, Julián Barón recolle aquel episodio, un proxecto que, xunto a outros traballos como La herencia de Chernobyl (2001) ou Una nueva vida: rumanos en España (2002-2003) supuxo unha das primeiras tentativas do fotógrafo na definición do seu discurso. Estas imaxes en branco e negro, de carácter documental, formaron parte dun proceso de descubrimento do medio fotográfico. O discurso artístico de Julián Barón experimentou dende entón diversas mutacións, servíndose en cada unha das súas diferentes etapas de novas ferramentas, métodos e estratexias. Cada nova experimentación visual provocou un “desengano” con respecto a traballos previos, unha renuncia que impulsaba a creatividade do autor a través da busca estética e do compromiso cunha idea aberta e complexa da obra artística, materializándose alén dos seus límites lingüísticos.
O Desengano é o testemuño da paixón inicial pola imaxe, e ao mesmo tempo unha revisión sen xenealoxía ou nostalxia, formada por fragmentos dunha creatividade cuxa capacidade para xerar novos argumentos nace da transgresión dos elementos anteriores. Deste xeito, Barón reconstrúe e redefine a posición cara as imaxes, que sitúan e reconfiguran a nosa memoria do acontemento e de certo imaxinario atesourado desde entón ao redor do próprio desastre do Prestige.
Curador: Xosé Lois Gutiérrez Faílde Peza audiovisual: Manuel Vargas
Julián Barón
4NOV–11DEC
Fundación Luis Seoane Sala de exposicións planta baixa
OUTRAS ACCIÓNS
29OCT 12.00hs >> Acción praia de Ézaro
18.00hs >> Presentación do proxecto na Casa da Cultura de Corcubión
30OCT 10.00 – 16.00hs >> Acción Cabo Roncudo, Corme
01NOV 12.00hs >> Acción praia de Riazor
04NOV 19.30hs >>Inauguración Oficial de FFoco e O Desengano
05NOV 10.00hs >> Prestige: Unidad Didáctica. Actividade formativa organizada pola Fundación Luis Seoane
17.00hs >> O Desengano de Alauda Negra. Presentación da publicación
Julián Barón
Julián Barón (Castellón de la Plana, 1978) é fotógrafo, docente e impulsor de proxectos que usan a imaxe como ferramenta social de pensamento. Formouse en Enxeñería Industrial, aínda que deixou o seu traballo para formar parte do colectivo Blank Paper de Madrid. De 2008 ata o 2015 dirixiu e foi profesor de fotografía Blank Paper Escola Valencia, Castelló e En liña.
Na abordaxe dos seus proxectos unha vontade permanente é expor perspectivas capaces de contribuír a debilitar a ríxida imaxinación colectiva e a cuestionar os discursos oficiais que constrúen a memoria, a historia e a identidade mediante a imaxe.
O seu traballo exhibiuse en Centre d’Art Pompidou-Metz (Francia), Netherlands Fotomuseum (Países Baixos), Get It Louder Beijing, ChangJiang Biennale, Chongqing (China) e Arts Santa Mònica (España), entre outros espazos nacionais e internacionais.
