Cadela Negra é un colectivo formado por Antonio Cortés e Lois Cid. Comezaron a traballar en dúo despois dunha residencia artística, ante a necesidade de afastarse da individualidade da produción fotográfica contemporánea, e buscando confluír as súas experiencias e visións diferentes dentro do medio fotográfico.

Antonio Cortés traballou como fotoxornalista para La Voz de Galicia. É técnico superior de Fotografía Artística pola EASD Antonio Faílde (Ourense) e tamén é técnico en Laboratorio de Fotografía pola EASD Mestre Mateo (Santiago de Compostela). Participou no fotozity de Ricardo Cases no 2012 na Coruña e mantívose activo rexistrando ritos pagáns e relixiosos de Galicia.

Lois Cid obtivo un mestrado en fotografía pola Royal Academy de Amberes graduándose cunha beca Horlait Dapsens outorgada a 4 proxectos finais de mestrado de Bélxica. É graduado en Belas Artespola universidade de Castela-A Mancha e ademais é técnico de fotografía pola EASD Antonio Faílde. Participou en exposicións, tanto a nivel nacional coma internacional coma o festival Encontros da Imagem (Braga, Portugal), a Grosvenor Gallery (Manchester, Reino Unido), o espazo XPO (Enschede, Países Baixos), o museo de fotografía FOMU, (Amberes, Bélxica) e na Galería Dispara (A Estrada, Pontevedra), entre outras.