Entre 2020 e 2023, Felipe Romero Beltrán documentou a vida de nove mozos marroquís aloxados nun centro para migrantes en Sevilla. Entrados ilegalmente en España e á espera da regularización da súa situación administrativa, permanecen obrigados a vivir neste lugar de retención. Durante estes tres anos, correspondentes á duración media do proceso legal para obter un permiso de residencia, Beltrán conseguiu establecer unha relación de confianza cos nove mozos, dos que narra o seu día a día.
Dialect mestura diferentes tipoloxías de imaxes: algunhas tomadas de maneira espontánea, outras postas en escena e elaboradas en colaboración cos protagonistas, que recrean, en particular, lembranzas da súa travesía. Fronte á violencia do sistema xudicial, do encerro e da migración forzada, Felipe Romero Beltrán contrapón unha linguaxe formal onde a dozura e a tenrura afloran en cada imaxe.
Felipe Romero Beltrán
Felipe Romero Beltrán (Bogotá, Colombia, 1992) é fotógrafo documental que vive e traballa en París. É recoñecido polos seus proxectos artísticos comprometidos, que exploran a migración e a identidade. As súas obras foron presentadas en numerosas exposicións individuais e colectivas a nivel internacional.
Beltrán publicou varios libros: Magdalena (2020) coa editorial Anómalas; Dialect (2023), publicado por Loose Joints Publishing; e Bravo (2025), tamén con Loose Joints, en colaboración coa Fundación MAPFRE, tras ser recoñecido co premio KBr Photo Award.
