Seguir a tradición familiar, coñecer a orixe dos produtos, asesorarse do mellor da tempada ou do mellor prezo… As clientas do mercado de San Agustín teñen moitos motivos para confiar diariamente na praza de abastos e rexeitar as grandes superficies comerciais. Pero tamén están todas de acordo en que os hábitos de consumo mudaron e que queda pouco público fiel no mercado máis valioso, arquitectonicamente falando, da cidade. As compañeiras Ángela F. Casal e Alba Barbadillo, responsables de A Parva, atoparon unha ducia de consumidoras do mercado dispostas a contar a súa conexión coa praza e retratarse no posto que máis visitan. As creadoras de contidos audiovisuais, Cristina Caamaño e Andrea Gestal son as responsables da parte técnica, tanto fotográfica como videográfica, nunha vibrante xornada con vimbios de lembranzas, reinvindicación e veciñanza.

A Parva e FFoco buscan, con esta exposición no propio mercado, facer reflexionar ao público sobre o consumo, a alimentación, o comercio local, o rural, a cidade, o barrio e as decisións persoais e colectivas.