Categoría: Programa actividades 2025

O cabelo como símbolo, a fotografía como espello, a imaxe como resistencia.

No marco da novena edición de FFoco, organizamos esta conversa imperdible arredor de “Pixaim”, o proxecto da artista visual Claudia Prechedes, que explora o cabelo como signo de resistencia e reapropiación identitaria fronte ao ideal estético eurocéntrico. Participan neste encontro a propia autora máis o sociólogo especializado en migracións e interculturalidade Nacho Álvarez. E a xornalista María Nieto é a encargada de moderar esta conversa, concebida como un espazo para pensar e celebrar a diversidade a través da fotografía.

Entrada de balde ata completar aforo.

Esta edición, FFoco reforza a súa presenza no Mercado de San Agustín, e máis en concreto no posto de A Parva, que durante unha xornada se vai converter nun espazo vivo de conversa e encontro arredor da fotografía contemporánea. Haberá presentacións e mostras de fotolibros, ás veces, de difícil acceso fóra do festival. Tamén haberá petiscos e grolos. Convidamos nós!

A principal forza de FFoco radica precisamente na confluencia, nun mesmo tempo e lugar, de autoras e autores, profesionais e amadores da fotografía, veciñanza e público en xeral, favorecendo o diálogo, o intercambio de experiencias e a reflexión crítica sobre os novos usos da imaxe fotográfica.

Acompáñanos!

Entidade singular é un termo utilizado en demografía e que o Instituto Nacional de Estadística define como calquera área habitable dun termo municipal, habitada ou excepcionalmente deshabitada, claramente diferenciada dentro do mesmo, e que é coñecida por unha denominación específica que a identifica sen posibilidade de confusión.

O idioma, a música, costumes, tradicións, a forma de ser dos habitantes do territorio ou a historia mesma foron as singularidades ou elementos diferenciadores que son utilizadas durante anos por institucións de toda índole e pensadores que buscan con diferentes obxectivos definir Galicia. A intención de IVán Nespereira con esta serie de imaxes non é definir: é percorrer e fotografar algúns deses miles de lugares buscando a súa singularidade.

Entidade Singular vén de sair do prelo e é o resultado do IV Premio Editorial de Fotografía Documental Galega, creado e impulsado por FFoco co obxectivo de fomentar a creación e produción de fotolibros con vinculación galega. O Premio conta coa colaboración da Fundación Marta Ortega Pérez (Fundación MOP) e, nesta ocasión, o libro resultante está editado por Dispara.

Cadela Negra amosa neste traballo a súa fascinación pola figura de Manfred Gnädinger Man —recoñecido personaxe artístico (pintor, escultor e filósofo) que desenvolveu a súa práctica no lugar de Camelle— e o seu legado ao tempo que experimentan de primeira man o lugar donde habitou durante corenta anos, ata que faleceu apenas un mes e medio despois da catástrofe do Prestige frente ao litoral galego. Así, o colectivo ourensán percorre os sendeiros que Manfred camiñaba tódolos días, imitando o seu modus vivendi, afondando na súa relación co mar e a piedra e cos residuos que rescataba do Atlántico, para crear un novo repertorio simbólico fortemente lírico, que conxuga nocións como paisaxe, memoria, acción e territorio, ao tempo que redefine o imaxinario xerado en torno á figura de Man.

MAN, o libro que agora presentamos en FFoco, é froito do III Premio Editorial de Fotografía Documental Galega, impulsado por FFoco para favorecer a publicación de ensaios fotográficos con vinculación galega.

«Estas fotografías forman parte dun proxecto tecido a través da lembranza da guerra de Bosnia. Observada dende a distancia, como a melodía dunha radio escoitada na infancia. Unha pulsión coa que intento narrar unha experiencia íntima, abafada nunha atmósfera escura e densa a onde aínda chega o rumor dunha pregunta mal formulada, perdida nos espazos incomprendidos atados ao inconsciente.

A cámara permíteme apresar a paisaxe e transformala nunha exquisita ensoñación mentres me dirixo a Saraxevo. Apenas permanece un arquivo dixital que conserva o viés do ollar, certa dor, e a éxtase stendhaliana provocada por unha beleza agonizante. Tal vez, un retrato do que non comprendo». — Miguel Auria

Este obradoiro exprés propón unha experiencia creativa aberta a todo o público, na que cada participante pode elaborar a súa propia chapa a partir de imaxes de antigas revistas ilustradas.

O obxectivo é xogar coa composición e co collage para crear unha nova imaxe a partir de materiais xa existentes, fomentando a creatividade e a experimentación visual. A actividade está pensada para que calquera persoa, sen importar a súa experiencia previa, poida participar en poucos minutos e levar consigo unha peza única elaborada por ela mesma. É unha proposta tanto para nenas e nenos como para persoas adultas, que mesmo poden divertirse e crear en conxunto.

Actividade continua, aberta durante toda a xornada. Cada ‘mini-obradoiro’ ten unha duración aproximada de 15 minutos por persoa. Non é necesaria inscrición previa: quen queira pode achegarse ao espazo do taller e informarse e inscribirse ao momento.

Restory é unha libraría de segunda man especializada en artes, creatividade e pensamento crítico, nacida en Barcelona no 2020 e trasladada á Coruña no 2025.

Máis alá dos libros raros ou de colección, os seus creadores, Pavel Milev e Patricia Acinas, rastrexan publicacións que quedaron fóra do radar —esas que habitan nas marxes— e que agochan unha riqueza maior da que aparentan a simple vista.

Buscan edicións capaces de sorprender, descolocar, inspirar e provocar novas formas de pensar, e impulsan artistas emerxentes desde o 2022 co seu programa Next Gen Talent.

Máis ca unha libraría, Restory é un arquivo sensible: unha colección en movemento dedicada a rescatar libros e publicacións marxinais, raras ou singulares.

Custodian o silenciado e o peculiar para deseñar coleccións especiais, bibliotecas vivas, espazos singulares e eventos pouco comúns.

Visita guiada polo espazo. De balde ata completar aforo

Este obradoiro, destinado a nenos e nenas de entre 8 e 12 anos e impartido por Sonia Hermida (Al otro lado. Asociación de familias lectoras), é un espazo de exploración e construción en torno aos fotolibros. Sabiades que ademais de coas ilustracións os álbumes poden contar historias a través da fotografía?

Nesta actividade imos coñecer unha ampla mostra de fotolibros que nos achegan dende a literatura infantil e xuvenil narracións diversas. Partindo de Entre as augas, fotolibro gañador do II Premio Editorial de Fotografía Documental Galega, crearemos os nosos propios libros fotografando a nosa contorna e os moitos segredos que podemos atopar en el. O texto? Un pequeno haiku que crearemos para completar o noso exemplar.

Inscricións: ffocofestival@gmail.com

Indicar no asunto ‘Obradoiro infantil’ e engadir no corpo da mensaxe nome completo do neno/a e do adulto que fai a inscrición.

Grupo máximo de 15 rapaces.

Durante o obradoiro, a organiación poderá tomar fotos dos participantes para difusión en redes sociais. A inscrición supón a aceptación expresa desta posibilidade.