Categoría: Programa actividades 2024

O obxectivo deste taller práctico é desenvolver un retrato contemporáneo sobre a cidade da Coruña, que se concretará nunha pequena publicación colectiva que os participantes levarán en formato PDF para que poidan imprimir de maneira independente.

Na primeira parte da actividade, Sebastián Bruno falará do seu traballo: como emprega o flash e como aborda a descoñecidos para retratalos. Despois, os participantes sairán a fotografar de maneira intensiva e espontánea, de maneira individual ou en grupos de ata tres persoas. A medida que se obteñan as imaxes, iranse descargando e imprimindo, para desenvolver de maneira colectiva a edición e narrativa do traballo resultante.

Os participantes deberán traer o seu propio portátil e cámara dixital con flash.

Inscricións: ffocofestival@gmail.com indicando no asunto ‘Obradoiro’

«Bóveda, a memoria no lugar, editado por Canela, é o primeiro libro do fotógrafo coruñés Óscar Górriz, unha obra que celebra a riqueza da cultura galega mediante un proxecto etnográfico, fotográfico e musical levado a cabo polo autor durante a súa residencia na Casa da Memoria, en Bóveda (Lugo).

A través de recollidas etnográficas e fotografías analóxicas de medio e gran formato, o autor mergúllase nas lembranzas dos maiores das aldeas do concello de Bóveda, recollendo relatos de vida, costumes, mitos e lendas. A partir deste material ten lugar unha creación musical, producindo cántigas novas de estilo tradicional, co fin de realizar unha achega á música popular, desde unha rexión onde os cantares de transmisión oral esmoreceran antes da chegada das novas xeracións de recolledores de finais do século XX.

O presente tratado subliña a relevancia de conservar vivas as nosas tradicións orais na era da Intelixencia Artificial, garantindo que o noso relato histórico colectivo permaneza accesible tanto en formato online como impreso.

Este proxecto é unha homenaxe ao patrimonio de Bóveda e de Galicia, un testemuño valioso que busca transmitir estas historias e saberes ás futuras xeracións, preservando así a esencia da nosa herdanza.

A publicación contén acceso mediante códigos QR a sons ambiente, conversas gravadas e músicas creadas polo autor, co fin de enriquecer e complementar a experiencia de lectura.

Este libro, que se presentará oficialmente nesta edición do Festival FFOCO, vai acompañado e inclúe o lanzamento do primeiro sinxelo musical do autor, a Xota de Bóveda, en colaboración co arranxista portorriqueño Pablo Hernández Mejías.

A presentación do libro irá aderezada con cantares tradicionais inspirados nas historias do libro, interpretados con pandeiro por Óscar ao estilo da música de foliada. A continuación compartiremos un aperitivo organizado por as compañeiras de A Parva

Máis que un festival, somos unha verbena! E se a meirande enerxía de FFoco radica na confluenza de autoras e autores, fotógrafos amadores e profesionais, veciñanza e público xeral, non queremos deixar pasar a oportunidade de reunirnos en torno a unha boa ración de petiscos e grolos. Así que, un ano máis, os convidamos a acompañarnos neste aperitivo fotográfico, que nesta ocasión terá lugar no patio da Fundación Luis Seoane trala foliada de Óscar Górriz.

Pasajero en tránsito é unha colección de tres libros-obxecto, editados por Candelaria Magliano. Son rexistros de viaxes, recortes do camiño, no que cada fotografía transfórmase nunha xanela cara fóra, a paisaxe aparece fragmentada ante o receptor. Os tres libros teñen como fío condutor a idea de viaxe como tránsito/mutación/pasaxe.

O traballo dos alumnos asistentes á segunda edición do obradoiro Novas Olladas á Costa Galega, o obradoiro impartido polo colectivo OLLO nunha vila da costa galega no verán, queda recollido nesta publicación, que contou coa colaboración de Ruth Montiel Arias como docente e editora e co apoio do Grupo de Estudos Audiovisuais (GEA) da Universidade de Santiago de Compostela (USC).

Por parte do Colectivo OLLO, os profesores- titores do proxecto foron os fotógrafos Vanessa Casteleiro e Óscar Corral, mentres que a coordinación do curso desenvolveuna Mª Soliña Barreiro González, profesora de fotoxornalismo da USC.

O obradoiro combinou diferentes sesións de teoría e de práctica, incluíndose tres saídas fotográficas e dúas sesións de edición.

A partir destas, os participantes fraguaron tres reportaxes documentais nas que todos e todas –profesores e estudantes– colaboraron con algunha fotografía dando como resultado este libro colectivo.

O libro Entre as augas, de Ana Núñez Rodríguez, con deseño de Tono Mejuto e Iván Nespereira, está composto por un conxunto de imaxes que cuestionan ao espectador sobre a dominación do sentido da vista, unha proposta baseada nunha serie de xogos conceptuais con respecto ao visible-non visible, que nos achega a outros modos de entender a percepción.

Esta nova publicación é froito do II Premio Editorial de Fotografía Documental Galega, creado e impulsado por FFoco. Festival de Fotografía da Coruña, co obxectivo de fomentar a creación e produción de fotolibros con vinculación galega.

Presentación do novo libro do mítico José Caruncho, editado pola Fundación Luis Seoane en colaboración con FFoco.

«Despois de máis de corenta anos traballando puiden reunir unha serie de fotografías que se adaptan perfectamente ao título que desde un principio tiña na cabeza: Ventá a Fisterra.

Para min Fisterra non é o pobo nin o faro, é toda a costa galega, para o que me centrei en fotografar ás persoas, paisaxes e detalles que a identifican. Sempre fun respectuoso con todo o que fotografei, especialmente coas persoas. Unha das características dos meus retratos é que as persoas fotografadas sempre teñen que estar a mirar á cámara; ou sexa, que teñen que saber que están a ser fotografadas. A miña intención é, por tanto, transmitir ao espectador o intercambio de miradas que teño con elas, toda a súa humanidade, e tentar conseguir, aí está o reto e a dificultade, que o espectador senta a necesidade de abrazalas».

Encontro adicado a reflexionar e debatir sobre o papel da fotografía na creación de imaxinarios en torno ao turismo.

A transición do sector primario ao terciario, partindo neste caso do turismo en España como paradigma dun modelo gastado, centra así esta sesión de proxeccións e mesa aberta comisariadas por Luis Díaz Díaz. Os traballos fotográficos de Arantxa Boyero, Manolo Espaliú, Cristina Arribas e Carmelo Vega, Néstor Lisón, Rubén Acosta, Javier Izquierdo e Elisa Gallego son o punto de partida para un debate posterior sobre turistificación e turismofobia, dous conceptos que estiveron tan en boga o pasado verán en Galicia, coa participación dos arquitectos e urbanistas Iago Carro, Íñigo Sánchez e Elisa Gallego.

Completa esta actividade a presentación online por parte de Alelí Mirelman do proxecto Casa Planas, un centro interdisciplinar de creación e interpretación contemporánea do turismo nas Illas Baleares. A singularidade deste espazo é que posúe o arquivo fotográfico máis importante da historia do turismo de masas, xa que conserva o fondo de máis de 3 millóns de imaxes da empresa Casa Planas, no seu momento o estudio fotográfico máis grande de España, que estivo activo entre as décadas dos anos 40 e 90 do século pasado, realizando reportaxes sociais, publicidade turística dos hoteis, fotografía aérea e postais.

Autor da imaxe: Néstor Lisón

O fin de festa desta edición vén da man de Robot City, que pechará a xornada con música atmosférica cargada de breaks con pasaxes mentais e hipnóticos. Música por computadora, influenciada pola sci-fi, o elektro, o techno e a mensaxe pura, clásico e atemporal.

Robot City son Salvador Rojo (que se encarga da música) e Caskbel (Vj e vídeo artista), quen misturará durante a sesión musical unha escolma das fotografías que compoñen as exposicións da oitava edición de FFoco.