Skip to content

Arredor da casa

Miradas de mulleres na Colección Alterarte

Lidia Alonso | María Covadonga Barreiro | María Blanco | Mónica Cabo | Mar Caldas | Marta Cerviño | Olaia Fernández | Julia Ferradás | Melania Freire | Maya Kapouski | Anna Katarina Martin | Sheila Pazos | Ana Pérez-Quiroga | María Prada | Sara Sapetti

Esta proposta recolle diversas miradas de autoras representadas na colección construida a partir da actividade da Sala Alterarte, espazo expositivo da Universidade de Vigo situado no Campus de Ourense e adicado a amosar propostas de artistas emerxentes, moitas delas tituladas na Facultade de Belas Artes da mesma Universidade.

O criterio de selección de obras fotográficas dentro desta colección non precisou ser forzado para favorecer a representatividade feminina, pois feminina é tamén a autoría da maioría desas obras, e tampouco resultou forzada a definición dun eixo temático, pois tamén a maioría desas imaxes xiran en torno aos espazos domésticos, aos obxectos e ás vidas privadas. Lonxe de supoñer isto un pregamento ao marco dos roles femininos socialmente asignados, ábrese un terreo de propostas que poñen en cuestión eses mesmos roles.

Director da Sala Alterarte: Xosé M. Buxán Bran | Coordinador de exposicións e Conservador da Colección Alterarte: Filemón Rivas | Curador: Enrique Lista

Colabora:
Logo Sala Alterarte
Logo Vicerreitoria Campus e Ourense
Maya Kapouski - FFOCO

Lidia Alonso

Lidia Alonso é graduada en Belas Artes pola Universidade de Vigo. Na súa serie fotográfica Cousas de avós amosa a reciclaxe creativa que ten caracterizado a un contexto rural galego pouco afeito ao usar e tirar. Este traballo foi selecionado por Manuel Sendón para formar parte da exposición Contorna (Sala Alterarte, 2013-2014) e do Proxecto Inédito.


María Covadonga Barreiro

María Covadonga Barreiro é doctora en Bellas Artes pola Universidade de Vigo (Mención Internacional, Premio Extraordinario de Doctorado e Premio Provincial á Investigación 2012) e ten un Máster en Dirección de Arte en Publicidade polo mesmo centro universitario. No ámbito artístico ten amosado o seu traballo en diferentes exposicións individuais e colectivas e ademais obtivo a Beca Novos Valores 2010 da Deputación de Pontevedra e o Primeiro Premio VII Certamen de Artes Plásticas da Deputación de Ourense. Na actualidade traballa como profesora na ESAD, Escola Superior de Arte Dramática de Galicia.


María Blanco

María Blanco é licenciada en Belas Artes pola Universidade de Vigo, realiza o máster en Deseño Téxtil e Superficies do Instituto Europeo di Design (Madrid) e o dutoramento en Creatividade Aplicada da Universidade Complutense de Madrid. Ademais da exposición indivudual na Sala Alterarte, a súa obra foi exposta en diversos certames e na Galería Metro de Santiago de Compostela. As súas fotografías, de apariencia pop desenfadada, agochan sempre un fondo inquietante.


Mónica Cabo

Mónica Cabo é licenciada en Belas Artes pola Universidade de Vigo. Vive e traballa en Barcelona. Ademais da amosada na Sala Alterarte, a súa obra tivo exposicións e proxectos individuais no Museo MARCO (Vigo), Sala Borrón (Oviedo), Fundación Granell (Santiago de Compostela), sala LAI (Xixón) e DF Galería (Santiago de Compostela). Participou en mostras colectivas no Museo Provincial de Lugo, Sant Andreu Contemporani (Barcelona), MUSAC (León), Fundación Luis Seoane (A Coruña), Blissland Gallery (Berlín), Sala Espacio AV (Murcia), MACUF (A Coruña) ou Espacio Menosuno (Madrid), entre outros. As súas propostas, limpas e contundentes, implican sempre un sólido posicionamento político queer.


Mar Caldas

Mar Caldas combina nos seus proxectos artísticos fotografía, texto e vídeo, incorporando tamén recursos performativos e procesuais.

Interesada polas políticas da representación e pola mirada do espectador, na súa obra trata cuestión como a subxectividade, as relacións de dominación entre os xéneros e entre as culturas ou quebrantamento dos roles sexuais.

Ademais, combina a práctica artística cunha labor teórica que deu lugar a conferencias, ensaios, artículos e comisariados.


Marta Cerviño

Marta Cerviño licenciouse en Belas Artes na Facultade de Pontevedra, onde realiza tamén o seu doutorado. Nas súas fotografías, a modo de diario persoal e autocoñecemento, explora a relación do individuo co contexto no que habita e como éste modela a súa identidade.


Olaia Fernández

Olaia Fernández obtivo o grao en Belas Artes pola Universidade de Vigo. Na súa serie fotográfica “véndese”, comezada cando aínda estaba a estudar na Facultade de Belas Artes de Pontevedra, rexistra con rigor formal e sen prexuizos as ruinas prematuras que constitúen os numerosos edificios abandonados a medio construir que se poden atopar ao longo do territorio galego. Esta serie foi selecionada por Manuel Sendón para a exposición Contorna (Sala Alterarte 2013-2014) e para o Proxecto Inédito.


Julia Ferradás

Julia Ferradás graduouse en Belas Artes pola Universidade de Vigo. A súa serie fotográfica Queridiñas constitúe unha homenaxe á casa rural galega, cando moitas delas están a desaparecer dentro dunha natureza na que sempre estiveron integradas. Esta serie foi selecionada por Manuel Sendón para formar parte da exposición Contorna, amosada na Sala Alterarte (2013-2014).


Melania Freire

Melania Freire estudiou Belas Artes en Vigo e despois titulouse en deseño textil e de moda, para expor nos teixidos as sensación e emocións que lle provoca a contemplación de cadros relevantes na Historia da Arte.

Como artista, móvese entre diferentes ámbitos. No eido audiovisual, foi directora de arte da longametraxe Longa Noite, dirixida por Eloy Enciso; e auxiliar do departamento de arte do filme O que arde, de Oliver Laxe. Na área textil, en 2019 recibiu o premio Mercedes-Benz Fashion Talent, durante a Semana da Moda de Madrid.

melaniafreire.com


Maya Kapouski

Maya Kapouski (Lucía García Rey) estudiou Belas Artes en Pontevedra, onde tamén fixo o Máster en Arte Contemporánea. Tralos seus primeiros traballos en escultura, instalación e perfomance, atopou na fotografía a mellor conexión entre todas as disciplinas, polo que a converteu no seu modo de expresión.

A súa obra reflicte os límites e relacións entre a vida e a arte, defendendo sempre unha actitude crítica e creativa. A rebeldía, a inadaptación e o cuestionamento das imposicións forman tamén parte da súa obra, que anima a manter sempre a ilusión e curiosidade de ser novos.


Anna Katarina Martin

Anna Katarina Martin centra a súa actividade artística en cuestións de representación e producción de significado nas artes visuais e o cinema, con especial interés pola cultura popular. Habitualmente non emprega nin un formato nin unha técnica determinada. Asegura estar especializada en temas, non en medios, e que as súas motivacións son a linguaxe e a narrativa. A partires dunha idea simple, executa proxectos moi laboriosos, onde as consideracións formais son tan importantes como o resultado final.

annakatarinamartin.com


Sheila Pazos

Sheila Pazos é unha creadora, con formación en Belas Artes e Moda, que configurou a súa propia idiosincracia cunha obra na que combina vídeo, fotografía, instalación, moda, modelado 3D e deseño gráfico. A súa fantasía sen límites fai que cada un dos seus proxectos se convirta nunha acción que transgrede os límites do convencional, aglutinando diferentes disciplinas que reflicten a forma de ser dunha artista do século XXI.


Ana Pérez-Quiroga

Ana Pérez-Quiroga é artista visual e intérprete. Licenciada en Escultura pola Facultade de Belas Artes da Universidade de Lisboa; Máster en Artes Visuais Intermedias na Universidade de Évora e doutorado en Arte Contemporánea no Colexio de Artes da Universidade de Coimbra. É investigadora no CHAIA – Centro de Historia da Arte e Investigación Artística da Universidade de Évora.

A súa obra xira arredor da vida diaria e a importancia de obxectos comúns. Tamén aborda problemas de xénero nos seus traballos, materializados en diferentes soportes: instalación, fotografía, textil e performance.

Expón regularmente desde 1999, entre as que destacan as seguintes mostras individuais: Museo Chiado de Lisboa (MNAC); Museo Nacional de Arte Antiga; Museo do Neorrealismo de Vila Franca de Xira; Museo de Arte Popular de Lisboa; e Arquivo Fotográfico Municipal de Lisboa.

anaperezquiroga.com


María Prada

María Prada é arquitecta pola Universidade da Coruña e doutora en Belas Artes pola Universidade de Vigo, onde tamén realizou o Master en Arte Contemporánea e obtivo o grao en Belas Artes. O seu delicado traballo coa técnica do collage emprega con frecuencia materiais fotográficos e, ademais de na Sala Alterarte, foi amosado en exposicións nacionais e internacionais (Portugal, República Checa, Francia, Bélxica, Canadá, Estados Unidos, México, Arxentina…)

mariaprada.es


Sara Sapetti

Sara Sapetti é licenciada en Belas Artes pola Universidade de Vigo e ademais ten cursado un Máster de Fotografía na escola madrileña Efti. Dende hai anos traballa como asesora técnica para empresas que importan material fotográfico e é especialista en formato medio e quipos de iluminación. Ademais tamén traballa como asistente dixital para estudios fotográficos.