Carlos Folgoso Sueiro (Verín, 1982) é fotógrafo e sociólogo, centrado na exploración da orixe do tempo, a gravidade, a creación e o destino do universo, así como dos sentimentos profundos dos seres humanos. A súa fotografía aborda cuestións sociais, xeopolíticas e ambientais, combinando intereses en xeografía, historia e filosofía, cunha especial atención á análise de mapas e gráficos. A maior parte dos seus proxectos céntranse en Rusia e na súa terra natal, Galicia.

O seu traballo foi publicado en medios internacionais como National Geographic, Geo, Stern, Vanity Fair, Sunday Times, Der Spiegel, L’Espresso, D-Repubblica, The British Journal of Photography, Paris Match ou De Volkskrant. A súa obra foi exposta en institucións como o Museo Hermitage de San Petersburgo e no Real Xardín Botánico (no marco de PHotoESPAÑA) e na sala Canal de Isabel II, ambas en Madrid.

En 2024 foi recoñecido co XII Premio Galicia de Fotografía Contemporánea, impulsado polo Outono Fotográfico.